ටර්ක්මෙනිස්තාන් යන ශ්‍රී ලංකා සංචිතය; වසීම්ට ලොකු වගකීමක්!

0
284

2022 FIFA ලෝක කුසලාන පාපන්දු තරගාවලිය හා 2023 ආසියානු කුසලාන පාපන්දු තරගාවලිය සඳහා සුදුසුකම් ලබා ගැනීමේ තරගාවලියේ දෙවන වටයේ ශ්‍රී ලංකා කණ්ඩායම මුහුණ දෙන මීළඟ තරගය ටර්ක්මෙනිස්තානය හමුවේ එළඹෙන නොවැම්බර් මස 19 වැනිදා පැවැත්වීමට නියමිතය. 

එම තරගය සඳහා සහභාගි වන ක්‍රීඩකයන් 22ක් ඇතුළත් ශ්‍රී ලංකා සංචිතය ශ්‍රී ලංකා පාපන්දු සම්මේලනය විසින් නිකුත් කර තිබේ. 

ශ්‍රී ලාංකීය පාපන්දු ප්‍රේක්ෂකයන් ‍රැසක් බලාපොරොත්තු තබාගෙන සිටි වසීම් රසීක් ද මෙම තරගය සඳහා නම් කළ ශ්‍රී ලංකා සංචිතය සඳහා ඇතුලත්ව සිටී. ඔහු ජර්මනියේ බර්ලයිනර් AK07 ක්‍රීඩා සමාජය නියෝජනය කළ ක්‍රීඩකයෙකි. ඔහු පසුගිය වසරේ සිට මෙරට ජාතික කණ්ඩායමට ඇතුළත් වීමට උත්සාහ කළ ද යම් යම් පරිපාලනමය ගැටලු නිසා එය අසාර්ථක විය.

තරගය සඳහා නම් කළ සංචිතය සඳහා සුපුරුදු නායක කවිඳු ඉශාන් නම් කර නොමැති අතර ඔහුට මාස 4ක පමණ විවේකයක් නිර්දේශ කර තිබේ. ඒ දකුණු කොරියාව සමඟින් පැවති තරගයේ දී ඇතිවූ උරහිසෙහි ආබාධයක් නිසාවෙනි.

තවද ශ්‍රී ලංකා කණ්ඩායම මීට පෙර නියෝජනය කළ ගෝල රකින්නා වූ මොහොමඩ් ලුත්ෆි මෙම සංචිතය සඳහා නම් කර නැත. ඒ ඔහු දණහිසේ ආබාධයකින් පීඩා විඳින නිසාවෙනි. ඒ වෙනුවට ශ්‍රී ලංකා වයස අවුරුදු 23න් පහළ කණ්ඩායමේ ගෝල රකින්නා වන නුවන් ගිම්හාන සංචිතය සඳහා ඇතුළත් කර තිබේ.

කවිඳු ඉශාන් සංචිතය සඳහා ඇතුළත් නොවන නිසා මේ අවස්ථාවේ දී ශ්‍රී ලංකා කණ්ඩායමේ නායකත්වය මොහොමඩ් ෆසාල්ට හිමිව ඇති අතර උපනායකත්වය සුජාන් පෙරේරාට හිමිව තිබේ.

ශ්‍රී ලංකාව හා ටර්ක්මෙනිස්තානය අතර තරගය එළඹෙන නොවැම්බර් මස 19 වැනිදා අශ්ගබට් හි කෝපේට්ඩැග් ක්‍රීඩාංගණයේ දී සවස 4.30ට ආරම්භ වීමට නියමිතය.